लातूर (एल पी उगीले) जिल्ह्यातील अवैध धंद्यावर प्रभावी कारवाई करण्यासाठी पोलीस अधीक्षक अमोल तांबे यांचे निर्देशांनंतर विशेष मोहीम राबवून अवैध धंद्यावर कार्यवाही करण्यात येत आहे. त्याचाच एक भाग म्हणून दिनांक 31/07/2025 रोजी जिल्हाभरात मासरेड चे आयोजन करून लातूर जिल्ह्यातील लपून-छपून हातभट्टी तयार करणाऱ्या ठिकाणावर लातूर पोलिसांकडून जोरदार कारवाई करत हातभट्टी दारू तयार करणारे, देशी-विदेशी दारूची अवैध विक्री व्यवसाय करणाऱ्या 84 लोकांवर 84 गुन्हे दाखल करण्यात आले आहेत. ज्यामध्ये 2 लाख 38 हजार 865 रुपयांचा मुद्देमाल जप्त केला आहे. तसेच स्वतःच्या आर्थिक फायद्या करिता जुगार घेणारे 10 लोकांवर 6 गुन्हे दाखल करण्यात आले आहेत. या गुन्ह्यामध्ये 85 हजार 765 रुपयांचा मुद्देमाल जप्त करण्यात आला.
अवैध धंद्यावर कार्यवाही करण्यासाठी 37 पोलीस अधिकारी, 174 पोलीस अमलदारांचे विशेष पथके बनवून राबविण्यात आलेल्या मासरेड मध्ये लातूर जिल्ह्यातील विविध पोलीस ठाण्याच्या हद्दीमधील दुर्गम भागात लपून- छपून हातभट्टी तयार करून त्याची साठवणूक व विक्री करणाऱ्यावर तसेच देशी-विदेशी मद्याची अवैध विक्री व्यवसाय करणारे 84 इसमावर 84 गुन्हे दाखल करण्यात आले आहेत. यामध्ये हातभट्टी, हातभट्टी तयार करण्याकरता वापरण्यात येणारे रसायन नष्ट करण्यात आले आहे.
अवैध धंद्याचे समूळ उच्चाटन करण्यासाठी पोलीस अधीक्षक अमोल तांबे,अपर पोलीस अधीक्षक मंगेश चव्हाण यांचे सूचना व मार्गदर्शनात लातूर पोलिसा कडून अवैध धंद्याविरुद्ध जोरदार कारवाई करण्यात येत असून सदरची कारवाई यापुढेही सुरूच राहणार असल्याचे पोलीस प्रशासन आणि कळवले आहे.
