‘बंधुत्व रुजवू या, समाज जोडू या!’ आणि ‘द्वेष नको, संवाद हवा!’ या प्रेरणादायी घोषवाक्यांनी सजलेला हा कार्यक्रम 'चला बदल घडवूया!' या निर्धाराने पार पडला. या बैठकीत महाराष्ट्र राज्यातील 'सद्भावना मंच'चे अध्यक्ष आणि प्रसिद्ध विचारवंत डॉ. सय्यद रफिक पारनेरकर यांच्या मार्गदर्शनाखाली महत्त्वपूर्ण मुद्द्यांवर चिंतनमंथन झाले.
डॉ. पारनेरकर यांनी आपल्या मार्गदर्शनात भारतीय समाजातील संत, पैगंबर आणि राष्ट्रघटकांवर प्रभाव टाकणाऱ्या विचारवंतांची शिकवण अधोरेखित केली. त्यांनी स्पष्ट शब्दांत सांगितले की, “ज्याप्रमाणे संत तुकाराम, संत कबीर, महात्मा बसवेश्वर, गौतम बुद्ध, तसेच पैगंबर मुहंम्मद यांनी समतेचा, माणुसकीचा आणि बंधुत्वाचा संदेश दिला, त्याच मूल्यांची पुनःस्थापना आज गरजेची आहे. आपण भारतीय संविधानाकडेही पाहिलं, तर ते देखील समता, बंधुता, न्याय आणि स्वातंत्र्य या सार्वत्रिक मूल्यांवर आधारलेले आहे. त्यामुळे सद्भावनेचे कार्य म्हणजे केवळ सामाजिक नव्हे, तर नैतिक आणि राष्ट्रीय कर्तव्य देखील आहे.”
त्यांनी असेही आवर्जून नमूद केले की, “समाजातील राग, द्वेष, आणि हिंसा यावर मात करून संवाद व विश्वासाच्या पूलांद्वारे आपणच आपल्या पुढच्या पिढीसाठी एक सुरक्षित आणि सुसंवादात्मक समाज तयार करू शकतो.”
या प्रसंगी 'सद्भावना मंच, उदगीर' या शाखेची अधिकृत स्थापना जाहीर करण्यात आली आणि नव्याने कार्यकारिणीची निवड करण्यात आली. नवनिर्वाचित पदाधिकाऱ्यांमध्ये डॉ. विजयकुमार पाटील यांची अध्यक्षपदी, तर मुजीब खतीब, डॉ. बळीराम भुकतरे, भदन्त नागसेन बोधी, विश्वनाथ बिरादार माळेवाडीकर आणि रतिकांत स्वामी यांची उपाध्यक्षपदी निवड झाली. डॉ. शेख असगर यांची सचिवपदी निवड झाली.
मंचाच्या कार्याचा मुख्य उद्देश म्हणजे समाजातील जात, धर्म, भाषा आणि संस्कृतीच्या पलीकडे जाऊन सर्व घटकांना एकत्र आणणे. हे उद्दिष्ट साध्य करण्यासाठी मंचाद्वारे विविध शैक्षणिक कार्यशाळा, संवाद परिषदा, सांस्कृतिक कार्यक्रम व सामुदायिक उपक्रमांचे आयोजन केले जाणार आहे.
या प्रसंगी बोलताना विजयकुमार पाटील म्हणाले, "सर्व समाजघटकांचे सहकार्य हीच आमची खरी ताकद आहे. संवाद आणि विश्वास हाच समाज परिवर्तनाचा मार्ग आहे."
कार्यक्रमात शहरातील विविध धर्म, जात, आणि सांस्कृतिक पातळीवरील मान्यवर व्यक्तींची मोठ्या संख्येने उपस्थिती लाभली होती. यामध्ये सामाजिक कार्यकर्ते, अध्यापक, धर्मगुरू, आणि युवा प्रतिनिधींचा समावेश होता.
कार्यक्रमाचे प्रास्ताविक जमात-ए-इस्लामी हिंद, उदगीर चे शहराध्यक्ष डॉ. इरफान हाशमी यांनी केले. सूत्रसंचालन प्रो. डॉ. मगदूम बिदरे यांनी प्रभावीपणे सांभाळले. कार्यक्रमाच्या शेवटी सचिव डॉ. असगर साहेब यांनी उपस्थितांचे आभार मानले.या कार्यक्रमात शहरातील विविध क्षेत्रात कार्यरत मान्यवर आवर्जून उपस्थित होते.
