उदगीर (एल.पी. उगिले)
उदगीर तालुक्यातील मौजे आवलकोंडा येथील विविध विकास सेवा सहकारी संस्थेच्या वतीने व्यंकटराव पाटील अवलकोंडकर यांची राष्ट्रवादी काँग्रेस शरदचंद्रजी पवार पक्षाच्या जिल्हा उपाध्यक्षपदी निवड झाल्याबद्दल सत्कार करण्यात आला. याप्रसंगी विविध कार्यकारी सेवा सहकारी संस्थेचे चेअरमन अभंगराव जाधव, व्हॉइस चेअरमन दीपक मुस्कावाड, जिल्हा मध्यवर्ती सहकारी बँकचे शिंदे, विविध विकास कार्यकारी सेवा सोसायटीचे सेक्रेटरी कदम इत्यादी मान्यवर उपस्थित होते.
आपल्या गावातील जुन्या जाणत्या नेत्याला जिल्हा उपाध्यक्षपदावर निवडले जाणे हा आपल्या गावाचा मान आहे. अशा भावना या सत्कारातून जाहीर होत होत्या.
सत्काराला उत्तर देताना व्यंकटराव पाटील यांनी स्पष्ट केले की, आपल्या गावाची शान, मान आणि सन्मान वाढीसाठी आपण सदैव प्रयत्न करू. तसेच पक्षश्रेष्ठींनी माझ्यावर जो विश्वास दाखवला आहे, तो विश्वास सार्थकी ठेवत महाविकास आघाडी साठी संघटितपणे साम, दाम, दंड, भेद या सर्व राजनीतींचा वापर करून तन-मन-धनाने आपण सज्ज आहोत. पक्षश्रेष्ठींनी ज्या अपेक्षा व्यक्त केल्या आहेत. त्या अपेक्षा पूर्ण करण्यासाठी आपण प्रयत्न करू. आपल्या गावाची किंवा पक्षश्रेष्ठीची मान खाली जाईल असे कोणतेही कार्य गेल्या पन्नास वर्षात आपल्या हातून झाले नाही, आणि भविष्यातही होणार नाही. देशाचे नेते शरदचंद्रजी पवार यांच्या विचारांना ग्रामीण भागातील तळागाळातील जनतेपर्यंत पोहोचवण्यासाठी आपण सर्वांनी प्रयत्न करू या. असे आवाहनही त्यांनी याप्रसंगी केले. या कार्यक्रमाचे सूत्रसंचालन आणि आभार प्रदर्शन विविध विकास कार्यकारी सेवा सोसायटीचे व्हाईस चेअरमन दीपक मुस्कावाड यांनी केले.
